अनिल वळवी यांचे निधन

मुंबई, ता. १० ः तब्बल २० वर्षे राज्यातील सार्वत्रिक निवडणुका पार पाडणारे राज्याचे सहमुख्य निवडणूक अधिकारी तथा सामान्य प्रशासन विभागाचे सहसचिव अनिल वळवी यांचे सोमवारी (ता. ९) हृदयविकाराच्या झटक्याने निधन झाले. ते अबोल, पण अतिशय मनमिळावू होते. त्याच्या जाण्याने लोकसभा, विधानसभा निवडणुकांचा चालताबोलता इतिहास हरपला आहे. अतिशय प्रतिकूल परिस्थितीतून आणि आश्रमशाळेत शिकून ते वरिष्ठ पदापर्यंत पोहचले होते. ते नंदुरबार जिल्ह्यातील धानोरा येथील होते. सुट्टी घेऊन गावी गेले होते. तेथेच त्यांचा मृत्यू झाला.