पूर्वसूचना न देता वीजपुरवठा खंडित केल्यास आंदोलन

खारघर, ता. ११ (बातमीदार) : महावितरणकडून कोणत्याही प्रकारची पूर्वसूचना न देता वीजपुरवठा खंडित केला जातो. त्यामुळे ऑनलाईन पद्धतीने घरी काम करणाऱ्या नोकरदारांना नाहक त्रास होत आहे. ही समस्या दूर करावी, अन्यथा आंदोलन छेडले जाईल, असे निवेदन भाजपच्या शिष्टमंडळाने खारघरमधील महावितरण अधिकाऱ्यांना दिले.

गेल्या काही दिवसांपासून तापमानात दिवसेंदिवस वाढ होत आहे. त्यात अनेक लोक घरांतून काम करत आहेत, तसेच काही विद्यार्थ्यांच्या परीक्षा सुरू आहेत. अशा वेळी महावितरणकडून कोणत्याही प्रकारची सूचना न देता वीजपुरवठा खंडित केला जात असल्यामुळे खारघरमधील भाजपचे नगरसेवक आणि पदाधिकाऱ्यांनी खारघर महावितरण कार्यालयातील अधिकारी एम. आर. पाटील यांची भेट घेऊन भारनियमनामुळे भेडसावणाऱ्या सर्व समस्यांची माहिती दिली. ज्या दिवशी वीजपुरवठा खंडित केला जात असेल, त्यांची माहिती नागरिकांना द्यावी, अशी मागणी त्यांनी केली.