पनीरच्या बेकायदा साठ्यावर कारवाई

सकाळ वृत्तसेवा

मुंबई, ता. ११ : मुंबईच्या चेंबूर कॉलनी येथून पनीरच्या बेकायदा साठ्यावर कारवाई करण्यात आली आहे. यात जवळपास १ लाखांचा साठा जप्त करण्यात आल्याची माहिती अन्न व औषध प्रशासनाने दिली.
६ मे रोजी गुन्हे नियंत्रण शाखा पोलिसांना प्राप्त माहितीच्या आधारे अन्न व औषध प्रशासन, पालिकेच्या अन्न सुरक्षा अधिकाऱ्यांनी चेंबूरच्या मे. डेअरी पंजाब, तसेच बदलापूर आणि भिवंडी येथील आस्थापनांची तपासणी केली. तेथे मे. यशोदा ऑर्गॅनिक फूड प्रा. लि., बदलापूर व मे. दिशा डेअरी, पिंपळास-भिवंडी येथून उत्पादित केलेल्या पनीरचा बेकायदा साठा आढळला. हा साठा कमी दर्जाचा असल्याचा संशय आहे. त्यातून पनीरचे नमुने घेऊन उर्वरित ४८३ किलोग्रॅमचा एक लाखांचा साठा जप्त करण्यात आला आहे. हे नमुने तपासणीसाठी प्रयोगशाळेत पाठवण्यात आले होते. हे नमुने मानकाप्रमाणे नसल्याचे प्रयोगशाळेने घोषित केले आहे. त्यामुळे संबंधितांविरोधात कारवाई करण्यात आली आहे.