ठाकुर्लीत तरुणाचा मृतदेह सापडला

डोंबिवली, ता. ११ : ठाकुर्लीतील नवीन हनुमान मंदिराच्या मागील एका इमारतीच्या गटारात एका २९ वर्षीय तरुणाचा मृतदेह बुधवारी सकाळी आढळून आला. चेतन निकम असे या तरुणाचे नाव असून, तो ठाकुर्ली परिसरातच विजेता सोसायटीत राहत होता. येथीलच एका बांधकाम व्यावसायिकाकडे तो चालकाचे काम करीत होता. याप्रकरणी रामनगर पोलिस ठाण्यात आकस्मिक मृत्यूची नोंद करण्यात आली आहे. दोन महिन्यांपूर्वी चेतनचे लग्न झाले होते; तर तीन दिवसांपूर्वी तो बेपत्ता असल्याची तक्रार दाखल करण्यात आली होती. इमारतीच्या वाहनतळामध्ये वाहन धुणाऱ्या व्यक्तीला दुर्गंधी येऊ लागल्याने त्याने पाहाणी केली असता गटारात मृतदेह सापडला. त्याने याची माहिती पोलिसांना दिली. अधिक तपास सुरू असल्याचे सहाय्यक पोलिस निरीक्षक योगेश सानप यांनी दिली.