शिकण्यासाठी वयाचे बंधन नाही

घणसोली, ता. ११ (बातमीदार) : उत्तम व्यवस्थापन होण्याकरिता प्रशिक्षित व्यवस्थापक असणे गरजेचे आहे. त्या दृष्टीने राज्यातील महासंघाने सर्वसमावेशक अभ्यासक्रम तयार करून व्यवस्थापक तयार करावे, असे परिपत्रक १५ मार्च २०१० रोजी सहकार आयुक्त निबंधक व सहकारी संस्था यांनी काढले होते. प्रत्येक व्यक्तीकडे दूरदृष्टी असली पाहिजे आणि त्यांनी एकाच गोष्टीवर न थांबता अनेक गोष्टींचा विचार केला पाहिजे. कोणतीही गोष्ट शिकण्यासाठी किंवा प्रशिक्षण घेताना वयाचे बंधन असता कामा नये, असे नवी मुंबई को-ऑपरेटिव्ह हौसिंग फेडरेशनचे सचिव भास्कर म्हात्रे यांनी सांगितले. नवी मुंबई को-ऑपरेटिव्ह हौसिंग फेडरेशन लिमिटेड संस्थेच्या १२ व्या तुकडीचा गृहनिर्माण संस्थेच्या व्यवस्थापन शिक्षणक्रमाचा प्रमाणपत्र वितरण सोहळा ८ मे रोजी भार्गव प्रशिक्षण केंद्र, सीबीडी बेलापूर येथे उद्योजक भार्गव यांच्या हस्ते करण्यात आला. यावेळी ते बोलत होते.