सैनिकांसाठी झिजणाऱ्या चिथडे दाम्पत्याचा सन्मान

जोगेश्वरी, ता. १२ (बातमीदार) ः लोकमान्य सेवा संघ पारले नागरिक दक्षता शाखेच्या वतीने जवान कृतज्ञता दिन कार्यक्रम १० मे रोजी करण्यात आला. सुमेधा चिथडे व योगेश चिथडे या पुणे येथील दाम्पत्याचा सन्मान करण्यात आला. सोल्जर्स इंडिपेंडंट रिहॕबिलिटेशन फाऊंडेशन (सिर्फ) च्या माध्यमातून जगातल्या सर्वांत उंच युद्धभूमीवर प्राणांची बाजी लावत तैनात असलेल्या भारतीय जवानांसाठी सियाचिन येथील हाॕस्पिटलमध्ये आॕक्सिजन जनरेशन प्लांट उभारल्याबद्दल त्यांना सन्मानित करण्यात आले. वीरपत्नींसाठी कार्यरत असलेल्या शिक्षिका सुमेधा चिथडे आणि एअर फोर्सच्या सेवेतून निवृत्त योगेश चिथडे यांचा एकमेव सुपुत्र मेजर म्हणून आर्मीमध्ये सेवेत आहे. त्यांच्याशी मुक्त संवाद साधून सैनिक परिवाराच्या वतीने कृतज्ञता व्यक्त करत समाजसेविका सुरक्षा घोसाळकर यांनी त्‍यांना पुढील कार्यासाठी शुभेच्छा दिल्‍या.