साडेचार लाखाची ऑनलाईन फसवणूक

डोंबिवली, ता. १२ ः पैसे ट्रान्स्फर करतो, असे सांगून ओटीपी मागवत अंबरनाथ येथील नरेंद्र पाठक यांची साडेचार लाखाची ऑनलाईन फसवणूक झाल्याची घटना उघडकीस आली आहे. याप्रकरणी महात्मा फुले चौक पोलिस ठाण्यात तुषार तांबे (३५) व सुमित जाधव (२८) यांच्याविरोधात तक्रार दाखल करण्यात आली आहे.
अंबरनाथ पूर्व येथे राहणारे नरेंद्र हे आहेर ऑटो प्राईम एल.एल.पी. येथे जनरल मॅनेजर म्हणून काम करतात. २७ ऑक्टोबर २०२१ ते १५ मार्च २०२२ या कालावधीत कल्याण मुरबाड रोड येथे आहेर ऑटो प्राईम एल.एल.पी. येथे तुषार व सुमित या मोबाईल धारकांनी पैसे ट्रान्स्फर करतो, असे सांगून त्यांच्याकडून ओटीपी घेऊन नरेंद्र व त्यांच्या पत्नीच्या नावे असलेले सुमारे साडेचार लाख रुपयांची रक्कम ऑनलाईन ट्रान्स्फर करून काढून घेतली. फसवणूक झाल्याचे लक्षात येताच नरेंद्र यांनी महात्मा फुले चौक पोलिस ठाण्यात धाव घेत तक्रार दाखल केली आहे.