पिकअपच्या धडकेमुळे विजेचा खांब वाकला

सकाळ वृत्तसेवा
डोंबिवली, ता. १३ ः कल्याण शिळ रस्त्यावरील सोनारपाडा भागात महावितरणच्या मेन लाईनच्या २ व १२ नंबरच्या विजेच्या खांबाला एका पिकअप व्हॅनची जोरदार धडक बसली. त्यामुळे हा खांब वाकला आहे. खांब रस्त्याच्या दिशेलाच वाकल्याने नागरिकांमध्ये काही काळ भीतीचे वातावरण निर्माण झाले होते; परंतु महावितरण अधिकाऱ्यांनी तत्काळ घटनास्थळी धाव घेत दुरुस्तीचे काम सुरू केले. यामुळे या भागातील वाहतूक संथ गतीने सुरू होती.

शुक्रवारी (ता. १३) पहाटे ४ च्या सुमारास मालवाहू बोलेरो पिकअपने या खांबाला धडक दिली आहे. याप्रकरणी मानपाडा पोलिस ठाण्यात पिकअपचालक दिनेश नागणे (वय २६) याच्याविरोधात गुन्हा दाखल करण्यात आला आहे. या अपघातामुळे डोंबिवली व कल्याण पूर्वमधील काही भागातील वीजपुरवठा खंडित झाला होता. पर्यायी वीजवाहिनीवरून या भागाचा वीजपुरवठा पूर्ववत सुरू करण्यात आल्याचे महावितरणच्या वतीने सांगण्यात आले.