हातात सुरा घेऊन पोलिस ठाण्यासमोर धुडगूस

नवी मुंबई, ता. १४ (वार्ताहर) : हातात सुरा घेऊन पोलिसांच्या अंगावर धावून जात सानपाडा पोलिस ठाण्यासमोर धुडगूस घालण्याचा प्रकार एका व्यक्तीने बुधवारी रात्री केला. तेजस जयदेव पाटील (वय ३०) असे या व्यक्तीचे नाव असून पोलिसांनी त्याला सुऱ्यासह ताब्यात घेऊन अटक केली.

तेजस पाटील हा सानपाडा सेक्टर ५ मध्ये राहण्यास असून बुधवारी रात्री १० वाजण्याच्या सुमारास तो सानपाडा पोलिस ठाण्यासमोर हातात सुरा घेऊन गेला होता. यावेळी त्याने आरडाओरड करत त्या ठिकाणावरून येणाऱ्या-जाणाऱ्या लोकांना सुरा दाखवून धमकावण्यास सुरुवात केली. त्यामुळे पोलिस ठाण्यात कर्तव्यावर असलेल्या पोलिसांनी त्याला सुरा खाली टाकून देण्यास सांगितले. त्याने पोलिसांच्या अंगावर धावून जात सुऱ्याने मारण्यासाठी धमकावण्यास सुरुवात केली. पोलिसांनी त्याला शिताफीने पकडून त्याच्या हातातील सुरा हिसकावून घेतला.