पावसाळ्यापूर्वी रस्त्यांची दुरुस्ती करा

खारघर, ता. १४ (बातमीदार) : पावसाळा काही दिवसांवर येऊन ठेपला आहे; मात्र खारघरमधील रस्त्यावर विविध एजन्सीकडून खोदकाम करताना झालेले खड्डे ‘जैसे थे’ आहेत. पावसाळ्यात पाणी साचून अपघाताच्या घटना घडण्याची शक्यता असून मान्सूनपूर्वी रस्ते दुरुस्ती करावे, असे निवेदन भाजपच्या शिष्टमंडळाने कार्यकारी अभियंता गिरीश रघुवंशी यांना दिले. खारघर परिसरातील विविध सेक्टरमध्ये विविध कंपन्यांकडून, तसेच जलवाहिन्या टाकण्यासाठी रस्त्यावर खोदून ठेवलेले खड्डे मोठ्या प्रमाणात आहेत. सदर कंपन्यांना सिडकोकडून खोदकामाची परवानगी देताना सदर रस्ते पूर्ववत करण्यासाठी भरमसाट रक्कम वसूल केली जाते; मात्र रस्तेदुरुस्ती केली जात नाही. त्यात खारघर वसाहतीत अनेक वर्षांपासून डांबरीकरण झाले नाही. त्यामुळे रस्त्याची दुर्दशा झालेली आहे. या शिष्टमंडळात खारघर शहर अध्यक्ष ब्रिजेश पटेल, नगरसेवक प्रवीण पाटील, शत्रुघ्न काकडे, रामजीभाई बेरा, स्थायी समिती सभापती ॲड. नरेश ठाकूर आदी पदाधिकारी उपस्थित होते.