सायवन कासा रस्त्यावर भीषण अपघात

कासा, ता. १४ (बातमीदार) : कासा सायवन खानवेल रस्त्यावर शुक्रवारी (ता. १३) रात्री पावणेदोन‍याच्या दरम्यान इको गाडीस भरधाव आर्टिगा गाडीने ठोकर दिली. यात दोन्ही वाहनांचे मोठे नुकसान झाले. इको चालक रूपेश कवळे (वय २०) हा वाघाडी येथून बापगावकडे जात असताना रात्री धरमपूर हद्दीत सायवनहून कासाकडे जाणाऱ्या भरधाव आर्टिगा गाडीने इको वाहनास समोरासमोर धडक दिली. यात इको गाडी खड्ड्यात पडून झाडाला अडकली. यात इकोचालकाच्या हाता, पायाला गंभीर मार बसला; तर अन्य एक जखमी झाला आहे. जखमींना वापी येथील रुग्णालयात दाखल केले आहे. कासा पोलिस ठाण्यात याबाबत तक्रार दाखल केली असून पुढील तपास सुरू आहे. सध्‍या लग्नसराई सुरू असून, या रस्त्यावरून रात्रीच्या वेळी भरधाव वाहने जात असून वारंवार अपघात घडत असतात.