म्हाडाच्या उमेदवारांची जूनमध्ये कागदपत्रे तपासणी

सकाळ वृत्तसेवा
मुंबई, ता. १४ : महाराष्ट्र गृहनिर्माण व क्षेत्रविकास प्राधिकरणातर्फे (म्हाडा) घेण्यात आलेल्या सरळसेवा भरती परीक्षेतील यशस्वी उमेदवारांची संवर्गनिहाय सूची प्रसिद्ध करण्यात आली आहे. त्यानुसार जून महिन्याच्या सुरुवातीपासून उमेदवारांना कागदपत्रे तपासणीसाठी बोलविण्यात येणार आहे. १ हजार ६३० उमेदवारांना कागदपत्रे तपासणीसाठी बोलावण्यात येईल. तसेच कमी पदांवर पात्र उमेदवारांची प्रथम नियुक्ती करण्यावर म्हाडा विचार करत आहे.

म्हाडा प्राधिकरणातील विविध संवर्गातील ५६५ पदांसाठी ३१ जानेवारी ते ९ फेब्रुवारी या कालावधीत ऑनलाईन परीक्षा घेण्यात आली. या परीक्षेसाठी २ लाख ७४ हजार उमेदवारांनी नोंदणी केली होती. यापैकी २ लाख ५८ हजार उमेदवारांनी परीक्षा शुल्क भरले होते; तर १ लाख ८० हजार उमेदवारांनी परीक्षा दिली होती. या परीक्षेतील यशस्वी उमेदवारांची संवर्गनिहाय सूची प्रसिद्ध करण्यात आली आहे. सामाजिक व समांतर आरक्षणानुसार जास्त पदसंख्या भरायची आहे तिथे १:२ आणि कमी पदसंख्या भरायची आहे तिथे १:३ या प्रमाणानुसार यादी जाहीर करण्यात आली आहे. त्यानुसार १ हजार ६३० उमेदवारांना कागदपत्र तपासणीसाठी बोलावण्यात येणार आहे. तसेच कमी पदांवर पात्र उमेदवारांची नियुक्ती प्रथम करण्याचा विचार म्हाडा करत आहे.