खारघरमधील पाणी समस्या सोडवावी

खारघर, ता. १५ (बातमीदार) : खारघर परिसरात पाणी समस्या गंभीर असून सिडकोने त्वरित पाणीप्रश्न सोडवावा, असे पत्र खारघर शहर मनसेचे उपाध्यक्ष गणेश बनकर यांनी सिडको आणि पालिका प्रशासनास दिले आहे. परिसरात गेल्या अनेक दिवसांपासून कमी दाबाने पाणीपुरवठा होत असल्यामुळे नागरिकांना अनेक समस्यांना तोंड द्यावे लागत आहे. ज्या सोसायटीत कमी दाबाने पाणीपुरवठा होत असेल, अशा सोसायट्यांना सिडकोकडून टँकरने पाणीपुरवठा केला जात आहे, पण तोही वेळेवर मिळत नाही. काही सोसायट्यांमध्ये शंभराहून अधिक सदनिका आहेत, अशा सोसायट्यांना बाहेरून पाणी विकत घ्यावे लागत आहे, असे त्यांनी निवेदनात म्हटले आहे.