२२ मेपर्यंत वर्सोवा महोत्सव

मुंबई, ता. १५ ः वर्सोवा विधानसभा क्षेत्राच्या आमदार डॉ. भारती लव्हेकर यांच्यातर्फे वर्सोवा, जोगेश्वरी पश्चिम येथील सिटी इंटरनॅशनल शाळेजवळील म्हाडा मैदानामध्ये वर्सोवा महोत्सवाचे आयोजन करण्यात आले आहे. २२ मे २०२२ पर्यंत चालणाऱ्या या महोत्सवाचे उद्‍घाटन महाराष्ट्राचे माजी मुख्यमंत्री आणि विरोधी पक्षनेते देवेंद्र फडणवीस यांच्या हस्ते करण्यात आले. या वेळेस देवेंद्र फडणवीस यांच्यासोबत विशेष अतिथी म्हणून विधान परिषदेचे विरोधी पक्षनेते व आमदार प्रवीण दरेकर, आमदार आणि शिवसंग्रामचे अध्यक्ष विनायक मेटे, माजी मंत्री व आमदार आशीष शेलार आणि प्रसिद्ध संगीतकार अनू मलिक उपस्थित होते. या वेळेस आमदार डॉ. भारती लव्हेकर यांच्या कार्य अहवालाचे प्रकाशन देवेंद्र फडणवीस यांच्या हस्ते करण्यात आले. वर्सोवा गौरव पुरस्कार सोहळ्याचेही आयोजन केले होते.