डोंबिवलीत गॅस सिलेंडरचा काळाबाजार

सकाळ वृत्तसेवा
डोंबिवली, ता. १९ ः घरगुती व व्यावसायिक सिलिंडरच्या किमतीत दिवसेंदिवस वाढ होत असताना डोंबिवलीत सिलिंडरचा काळाबाजार सुरू असल्याचे समोर आले आहे. घरगुती सिलिंडरमधून व्यावसायिक सिलिंडरमध्ये अवैधरित्या गॅस भरत ग्राहकांना जास्त दरात कमी वजनाचे गॅस सिलिंडर देत असल्याचा प्रकार उघडकीस आला आहे. मानपाडा पोलिसांनी याप्रकरणी बाळप्पा उनगप्पा ईरगदिन (वय ४२) व महेश गुप्ता (वय ३५) या दोघांना डोंबिवलीतून अटक केली आहे. शनिवारपर्यंत त्यांना पोलिस कोठडी सुनावण्यात आली आहे. घरगुती गॅसमधून लोखंडी नोजल पिनच्या साह्याने ते व्यावसायिक सिलिंडरमध्ये गॅस भरत असल्याचे उघड झाले आहे.

डोंबिवलीजवळील हेदुटने शिरढोण रोडवर एका वीटभट्टीच्या मागे उघड्यावर गॅस सिलिंडरमधून गॅस चोरी होत असल्याचे फोटो काही दिवसांपूर्वी समाज माध्यमावर व्हायरल झाले होते. त्यानुसार मानपाडा पोलिस ठाण्याचे वरिष्ठ पोलिस निरीक्षक शेखर बागडे यांच्या निर्देशानुसार सहायक पोलिस निरीक्षक अविनाश वणवे यांच्या पथकाने वीटभट्टीवर जाऊन चौकशी केली असता तेथे काही आढळून आले नाही. त्यानंतर फोटोमधील टेम्पोवरील मोबाईल नंबरवर पोलिसांनी फोन करून टेम्पो चालक विनोदकुमार रामशब्द यादव (वय ३५) याला सोनारपाडा येथून ताब्यात घेतले. यादवने महेश गुप्ता याला भारत गॅस सिलिंडरची वाहतूक करण्यासाठी टेम्पो भाड्याने दिला होता. यादव याच्याकडून महेशची माहिती काढत गुन्हे शाखा घटक ३ ने डोंबिवलीतील सांगावे येथून महेश व लोढा हेवन येथून बाळप्पा यांना ताब्यात घेतले. त्यांच्याकडून १२ घरगुती सिलिंडर व २ मोबाईल जप्त करण्यात आले. याचा पुढील तपास सहाय्यक पोलिस निरीक्षक ज्ञानोबा सूर्यवंशी हे करीत आहेत.