मुलुंडमध्ये बालिकेवर बलात्कार

चेंबूर (बातमीदार) : मुलुंड येथील गव्हाणपाडा परिसरात राहणाऱ्या एका सहावर्षीय मुलीवर बलात्कार करणाऱ्याविरोधात नवघर पोलिसांनी गुन्हा दाखल करत त्याला आज अटक केली आहे. हेमंत वैती (५१) असे बलात्कार करणाऱ्या आरोपीचे नाव आहे. गव्हाण पाडा परिसरातील एका खेळाच्या मैदानात सोमवारी (ता. २३) संध्याकाळी सहाच्या सुमारास पीडित मुलगी खेळत होती. या मैदानाच्या जवळ राहणाऱ्या हेमंतने या मुलीशी गोड गोड बोलून तिला निर्जनस्थळी नेत अत्याचार केला. घडलेला सर्व प्रकार मुलीने घरी येऊन आपल्या आई-वडिलांना सांगितला. त्यानंतर आई-वडिलांनी तत्काळ नवघर पोलिस ठाण्यात तक्रार नोंदवली. त्यानुसार नवघर पोलिसांनी हेमंतविरोधात गुन्हा दाखल करून त्याला तत्काळ अटक केली आहे.