मध्य रेल्वेच्या विस्टाडोमला उत्तम प्रतिसाद

मुंबई, ता. २५ : मध्य रेल्वेने मुंबई-गोवा आणि मुंबई-पुणे मार्गावर सुरू केलेल्या विस्टाडोम डब्यांना प्रवाशांकडून चांगला प्रतिसाद मिळत आहे. १ ऑक्टोबरपासून २३ मेपर्यंत तब्बल ५० हजार प्रवाशांनी विस्टाडोम डब्यातून प्रवास केला.
मध्य रेल्वेकडून छत्रपती शिवाजी महाराज टर्मिनस - मडगाव जनशताब्दी एक्स्प्रेस आणि मुंबई-पुणे-मुंबईदरम्यान धावणाऱ्या डेक्कन एक्स्प्रेस आणि डेक्कन क्वीनला विस्टाडोम डबे बसवण्यात आले. दोन्ही लोहमार्गावरील दऱ्या-खोऱ्या, नदी, पर्वतरांगांचे विलोभनीय दृश्य पाहण्यासाठी प्रवाशांकडून विस्टाडोम डब्यांना चांगला प्रतिसाद मिळत आहे. गेल्या आठ महिन्यांच्या कालावधीत मध्य रेल्वेने ४९ हजार ८९५ प्रवाशांची नोंदणी करून ६.४४ कोटी महसूल मिळवला आहे.
मुंबई-मडगाव जनशताब्दी एक्स्प्रेसला २०१८ मध्ये विस्टाडोम डबा जोडण्यात आला होता. त्याला मिळणाऱ्या उत्तम प्रतिसादामुळे गेल्या वर्षी २६ जूनपासून मुंबई-पुणे डेक्कन एक्स्प्रेसला आणि १५ ऑगस्टपासून डेक्कन क्वीनला विस्टाडोम डबा जोडण्यात आला. या तिन्ही विस्टाडोम डब्यांना प्रवाशांचा उत्तम प्रतिसाद मिळत आहे.
---
१. छत्रपती शिवाजी महाराज टर्मिनस- मडगाव जनशताब्दी एक्स्प्रेसच्या विस्टाडोम डब्यातून १८ हजार ६९३ प्रवाशांनी प्रवास केला, त्यातून रेल्वेला ३.७० कोटींचे उत्पन्न मिळाले.
२. छत्रपती शिवाजी महाराज टर्मिनस - पुणे डेक्कन क्वीनच्या विस्टाडोम डब्यातून १४ हजार ७४९ प्रवाशांनी प्रवास केला. त्यातून रेल्वेला १.६३ कोटींचे उत्पन्न मिळाले.
३. छत्रपती शिवाजी महाराज टर्मिनस - पुणे डेक्कन एक्स्प्रेसमधून १६ हजार ४५३ प्रवासी वाहतुकीतून १.११ कोटी महसूल प्राप्त झाला आहे.
---