जॉब कन्सल्टन्सी ऑफिसला आग

सकाळ वृत्तसेवा
ठाणे, ता. ३० ः ठाणे मार्केटमधील ऋषभ आर्केड बिल्डिंगच्या चौथ्या मजल्यावरील ब्ल्यू क्रस्ट या जॉब कन्सल्टन्सी ऑफिसला आग लागल्याची घटना सोमवारी दुपारी चारच्या सुमारास घडली. या आगीत कोणालाही दुखापत झाली नसून ऑफिसच्या फर्निचर, लॅपटॉप आदी साहित्याचे नुकसान झाले. तसेच आगीवर नियंत्रणही मिळविण्यात यश आल्याची माहिती आपत्ती व्यवस्थापन विभागाने दिली.

ठाण्याच्या भाजी मार्केटमध्ये ऋषभ आर्केड बिल्डिंगच्या चौथ्या मजल्यावर सचिन जोग यांचे ब्ल्यू क्रस्ट या जॉब कन्सल्टन्सीचे ऑफिस आहे. त्याला आग लागल्याची माहिती मिळताच घटनास्थळी नौपाडा पोलिस, आपत्ती व्यवस्थापन विभागाचे कर्मचारी व अग्निशमन दलाचे जवान यांनी धाव घेतली. त्या आगीवर अग्निशमन दलाचे जवान व आपत्ती व्यवस्थापन विभागाच्या कर्मचाऱ्यांच्या मदतीने नियंत्रण मिळविण्यात यश आले. मात्र, त्या आगीमध्ये ऑफिसमधील सर्व फर्निचर, लॅपटॉप अशा साहित्याचे नुकसान झाल्याची माहिती आपत्ती व्यवस्थापन अधिकारी अविनाश सावंत यांनी दिली.