नवी मुंबईत शंभर रुग्णांची नोंद

नवी मुंबई, ता. ७ : नवी मुंबई शहरात सलग तिसऱ्या दिवशी कोविड रुग्णांनी उच्चांकी आकडा गाठला. आज (ता. ७) महापालिका क्षेत्रात तब्बल १०० कोविड रुग्णांची नोंद झाली. त्यामुळे शहरातील उपचाराधीन असणाऱ्या कोविड रुग्णांचा आकडा आता ४७२ पर्यंत पोहोचला आहे.

मागील काही दिवसांपासून शहरात पुन्हा कोविड आजाराने डोके वर काढले आहे. कोविडच्या वाढत्या रुग्णांमुळे महापालिका आयुक्त अभिजीत बांगर यांनी आरोग्य विभागाला कोविड चाचण्यांचे प्रमाण वाढवण्याचे आदेश दिले आहेत. बांगर यांच्या आदेशानंतर महापालिकेतर्फे रेल्वे स्थानके, नागरी आरोग्य केंद्र व महापालिकेची रुग्णालये येथे कोविड चाचण्यांचे प्रमाण वाढवण्यात आले आहेत. त्यानुसार आज तब्बल सुमारे तीन हजारपेक्षा जास्त लोकांच्या चाचण्या केल्या होत्या. त्यापैकी १०० लोकांना कोविडची लागण झाल्याचे निष्पन्न झाले आहे. मागील तीन दिवसांत शहरात ३०० कोविड रुग्णांची नोंद झाल्यामुळे शहरात कोविडची साथ वाढत असल्याने आरोग्य विभागाला सतर्कतेचे आदेश देण्यात आले आहेत.