मिरा भाईंदर पालिकेकडून इम्पिरिकल डाटा जमा

भाईंदर, ता. ८ (बातमीदार) : ओबीसी आरक्षणासंदर्भात मिरा भाईंदरमधील इम्पिरिकल डाटा गोळा करण्याचे काम पूर्ण झाले आहे. आता गोळा करण्यात आलेली माहिती संकलित करून लवकरच ती राज्य सरकारकडे पाठवण्यात येणार आहे.

निवडणुकांमध्ये ओबीसी आरक्षण कायम ठेवण्यासाठी इम्पिरिकल डाटा गोळा करण्याचे काम राज्य सरकारने हाती घेतले आहे. त्यानुसार मिरा-भाईंदरमध्येही महापालिकेने ही माहिती तीन दिवसांत गोळा केली आहे. ही माहिती गोळा करण्यासाठी मतदार याद्यांच्या एकंदर ६०६ भाग याद्यांच्या मदतीने ६०६ कर्मचाऱ्यांनी घरोघरी जाऊन मतदारांची जातनिहाय माहिती गोळा केली आहे. यात इतर मागासवर्गीय (ओबीसी), विशेष मागासवर्गीय (एसबीसी) आणि एनटी आदींची नोंद करण्यात आली आहे. ही सर्व माहिती राज्य सरकारने दिलेल्या नमुन्यात नोंदवण्याचे काम सध्या सुरू आहे. लवकरच ती माहिती सरकारकडे पाठवण्यात येईल, अशी माहिती उपायुक्त मारुती गायकवाड यांनी दिली.