अखेर पालिकेचे बॅरिकेड लागले!

मानखुर्द, ता. ९ (बातमीदार) ः घाटकोपर-मानखुर्द जोडरस्त्यावर जलवाहिनीसाठी केलेल्या खोदकामाच्या ठिकाणी पालिकेचे बॅरिकेटेड लागल्यामुळे नागरिकांनी सुटकेचा निःश्वास सोडला आहे. बुधवारी (ता. ८) बॅरिकेट लावून सुरक्षेची उपाययोजना केल्याचे दिसून आले.
अण्णा भाऊ साठेनगरासमोर घाटकोपर-मानखुर्द जोडरस्ता जलवाहिनीच्या कामासाठी खोदण्यात आला होता. कामानंतर तो रस्ता भराव टाकून पूर्ववत करणे किंवा त्या ठिकाणी सुरक्षेच्या दृष्टिकोनातून बॅरिकेट लावणे गरजेचे होते. दोन्हीपैकी एकही गोष्ट न केल्यामुळे वेगात येणाऱ्या वाहनांच्या चालकांना अनपेक्षितरीत्या खड्डा दिसायचा व त्यामुळे वाहन आदळू नये यासाठी ते वेग कमी करण्याचा प्रयत्न करत होते. त्यामुळे त्या वाहनाच्या मागून येणारे वाहन त्याला धडकण्याची भीती निर्माण झाली होती.