बियाणे खरेदीत काळजी घ्या

वाडा, ता. १२ (बातमीदार) ः तालुक्यातील शेतकऱ्यांनी बियाणे खरेदी करताना गुणवत्ता व दर्जाची हमी देणाऱ्‍‌या अधिकृत विक्रेत्यांकडूनच पावतीसह खरेदी करावे, असे आवाहन पंचायत समितीचे कृषी अधिकारी बाबासाहेब शिंदे यांनी केले आहे.
तालुक्यातील शेतकऱ्यांनी अधिकृत परवानाधारक विक्रेत्यांकडून बियाणे खरेदी करताना पावतीसह खरेदी करावे. पावतीमध्ये बियाणांचा संपूर्ण तपशील, खरेदीदाराचे नाव, गाव, पीक, वाण, लॉट नंबर याबाबत माहिती असणे आवश्यक आहे. खरेदी केलेल्या बियाणांचे वेष्टण, पिशवी, टॅग, खरेदीची पावती व त्यातील थोडे बियाणे पिकाची कापणी होईपर्यंत जपून ठेवावे. भेसळीची शंका दूर करण्यासाठी बियाणांचे पाकीट सीलबंद, मोहोरबंद असल्याची खात्री करावी. कमी वजनाच्या निविष्ठा तसेच छापील किमतीपेक्षा जास्त किमतीने विक्री अथवा इतर तक्रारीसाठी जवळच्या कृषी विभागाशी संपर्क करावा, असे आवाहन शिंदे यांनी केले आहे. तसेच बनावट व भेसळयुक्त बियाणांमुळे होणारी फसवणूक टाळण्यासाठी शेतकऱ्यांनी सावधगिरी बाळगावी व बियाणांबाबत शंका असल्यास कृषी विभागाच्या आवाहानानुसार कृषी विभागास संपर्क साधावा. बियाणांच्या तक्रारीबाबत तालुका कृषी अधिकारी, पंचायत समिती कृषी अधिकारी यांच्याकडे अर्ज सादर करावा, असेही त्‍यांनी सांगितले आहे.