कम्युनिस्ट पक्षाचा मोर्चा तहसीलदार कार्यालयावर धडक

सरळगाव, ता. १३ (बातमीदार) ः मुरबाड तालुक्यातील हजारो आदिवासी बांधव मूलभूत सुविधांपासून वंचित आहेत. त्यांना हक्काच्या सुविधा मिळाव्यात, यासाठी सरकारचा निषेध करीत भारतीय कम्युनिस्ट पक्षाच्या वतीने मोर्चा काढण्यात आला होता. या मोर्चात तालुका सेक्रेटरी कॉ. पी. के. लाली, कॉ. कविता वरे, तालुका अध्यक्ष कॉ. दिलीप कराळे, कॉ. दिनेश जाधव, सचिव मुरबाड तालुका कॉ. सागर भावार्थे आदी सहभागी झाले होते. तहसीलदार कार्यालयात या मोर्च्यातील शिष्टमंडळाच्या प्रतिनिधी तहसीलदार संदीप आवारी यांना भेटून नेहरूवाडी येथील कातकरी रस्ता, आदिम जमातीच्या लोकांना तत्काळ जात प्रमाणपत्र व शिधापत्रिका देण्यात यावे, साखरमाची येथील आदिवासी कुटुंबाचे तत्काळ पुनर्वसन करणे आदींसह ५७ मागण्यांचे निवेदन दिले.