तीन अपघातांमुळे वाहतूककोंडी

पनवेल ः सायन-पनवेल मार्गावर कामोठे येथील उड्डाणपुलावर सकाळी आठ वाजता अपघाताची घटना घडल्यानंतर सकाळी अकराच्या सुमारास सायन-पनवेल महामार्गावरील खारघर उड्डाणपुलावर तीन वाहने एकमेकांवर धडकून अपघात झाला. या अपघातात कोणीही जखमी झाले नसले तरी तीन वाहनांचे नुकसान झाले आहे. या अपघातानंतर बेलापूर खिंडीमध्येही दोन वाहनांमध्ये किरकोळ अपघात झाला. अपघातात देखील कुणीही जखमी झाले नसल्याचे पोलिसांनी सांगितले. या तीन अपघातांमुळे रविवारी दिवसभर सायन-पनवेल मार्गावर वाहतूक कोंडीसदृश्य परिस्थिती होती. त्यामुळे वाहनचालकांना त्याचा फटका बसला. वाहतूक पोलिसांचीदेखील चांगलीच तारांबळ उडाली.