श्रीकांत शिंदे यांच्याशी फाटक यांची चर्चा

सकाळ वृत्तसेवा
ठाणे, ता. २२ ः एकनाथ शिंदे यांनी पुकारलेले बंड थोपवण्यासाठी शिवसेनेने कंबर कसली आहे. शिंदे यांची मनधरणी करण्यासाठी सुरतला शिवसेनेचे सचिव मिलिंद नार्वेकर आणि रवींद्र फाटक यांनी भेट घेतल्यानंतर बुधवारी शिंदे यांच्या ठाण्यातील निवासस्थानी जाऊन खासदार श्रीकांत शिंदे यांची रवींद्र फाटक यांनी भेट घेतली. या वेळी झालेल्या चर्चेअंती शिवसेना-भाजप युती व्हावी अशी इच्छा खासदार श्रीकांत शिंदे यांनी व्यक्त केली असल्याची माहिती फाटक यांनी दिली.

एकनाथ शिंदे यांचे बंड थोपवण्यासाठी मुख्यमंत्री उद्धव ठाकरे यांनी रवींद्र फाटक आणि मिलिंद नार्वेकर यांच्या खांद्यावर जबाबदारी दिल्यानंतर त्यांनी मंगळवारी एकनाथ शिंदे यांची भेट घेतली होती. त्यानंतर बुधवारी फाटक यांनी शिंदे यांच्या निवासस्थानी जाऊन खासदार श्रीकांत शिंदे यांची भेट घेतली. या वेळी श्रीकांत शिंदे यांच्याशी सुमारे तासभर चर्चा झाली. तसेच श्रीकांत शिंदे यांनीदेखील शिंदे यांच्या भूमिकेबाबत काही बोलण्यास नकार दिला असून शिवसेना-भाजपची युती व्हावी अशी आशा व्यक्त केल्याचेही फाटक यांनी सांगितले. काँग्रेस, राष्ट्रवादीबरोबर महाविकास आघाडी हेदेखील अयोग्यच होते, असेही श्रीकांत शिंदे यांनी सांगितले.