फेलीवाल्यांमध्ये हाणामारी; दोघे जखमी

सकाळ वृत्तसेवा
डोंबिवली, ता. २६ ः विठ्ठलवाडी रेल्वेस्थानकाच्या बाहेर हातगाडीवर टोमॅटो विक्री करण्यावरून चौघा फेरीवाल्यांमध्ये हाणामारीची घटना घडली. लोखंडी वजन काट्याने एकमेकांना मारहाण करण्यात आली आहे. यात दोघे जखमी झाले असून याप्रकरणी कोळसेवाडी पोलिस ठाण्यात परस्पर विरोधी गुन्हे दाखल करण्यात आले आहेत.

विठ्ठलवाडी रेल्वेस्थानकाबाहेरील सार्वजनिक रोडवरील हातगाडीवर टोमॅटो विक्रीवरून शनिवारी (ता.२५) रात्री चार फेरीवाल्यांमध्ये वाद झाला. उमेश सोनकर व कैलास सोनकर या दोघा भावांचा अविनाश व गोविंदा गुप्ता या दोघा भावांशी शनिवारी सायंकाळी वाद झाला. अविनाश व उमेश यांच्यात सुरुवातीला टोमॅटो विकू नको, भाजी विक यावरून वाद झाला. या वादात त्यांचे भाऊदेखील पडले. शेवटी या वादाचे रूपांतर हाणामारीत होऊन लोखंडी वजन काट्याने एकमेकांना मारहाण केली गेली. या हाणामारीचा व्हिडीओ सोशल मीडियावर व्हायरल झाला आहे. याप्रकरणी कोळसेवाडी पोलिस ठाण्यात परस्पर विरोधी गुन्हे दाखल झाले आहेत.