डंपरच्या धडकेत दुचाकीस्‍वार ठार

नवी मुंबई, ता. २७ (वार्ताहर) : वाशीतून मानखुर्दला जाणाऱ्या तरुणाच्या दुचाकीला भरधाव डम्परने धडक दिल्याने त्‍याचा मृत्यू झाल्याची घटना सोमवारी पहाटे सायन-पनवेल मार्गावर वाशी टोल नाक्याजवळ घडली. अपघातानंतर वाशी पोलिसांनी डम्पर चालकाविरोधात गुन्हा दाखल करून ताब्यात घेतले.
तरुणाचे नाव किशोर बाळकृष्ण काटकर (२९) असून तो मानखुर्द येथील महाराष्ट्र नगरमध्ये राहत होता. रविवारी सायंकाळी किशोर कामानिमित्त नवी मुंबईत आला होता. त्यानंतर मध्यरात्री दीडच्या सुमारास दुचाकीने मानखुर्द येथे जात होता. वाशी टोल नाक्याजवळ मागून भरधाव डम्परने त्याला धडक दिली. किशोरचे दोन्ही पाय डम्परच्या पुढील चाकाखाली आल्याने तो गंभीर जखमी झाला. घटनेची माहिती मिळताच वाशी पोलिसांनी घटनास्थळी धाव घेत किशोरला वाशीतील महापालिकेच्या रुग्णालयात दाखल केले. त्या ठिकाणी प्राथमिक उपचार केल्‍यावर त्‍याला जे. जे. रुग्णालयात पाठविण्यात आले. मात्र रुग्णालयात दाखल करण्यापूर्वीच त्याचा मृत्यू झाला.