ऑपरेशन ऑल आउटमध्ये २० आरोपींना अटक

पालघर, ता. २८ (बातमीदार) ः पालघर पोलिसांकडून राबवण्यात आलेल्या ऑपरेशन ऑल आऊटमध्ये २० आरोपींना अटक करण्यात आली; तर दारूबंदी कायद्याप्रमाणे २८ गुन्हे दाखल करण्यात आले. हे ऑपरेशन पोलिस अधीक्षक बाळासाहेब पाटील व अप्पर पोलिस अधीक्षक प्रकाश गायकवाड यांच्या मार्गदर्शनाखाली पार पडले.
ऑपरेशन ऑल आऊटमध्ये नाकाबंदी, कोम्बिंग ऑपरेशन, ॲक्शन टीम, हंटर टीमद्वारे कारवाई करण्यात आली. या वेळी ५३ पोलिस अधिकारी व ३१९ पोलिस अमलदारांनी २० तास १६ पोलिस ठाण्याच्या हद्दीत ३२ ठिकाणी नाकाबंदी; तर २० ठिकाणी कोम्बिंग ऑपरेशन करण्यात आले. या ऑपरेशनदरम्यान आठ वॉरंट व ५१ समन्सची बजावणी करण्यात आली. दारूबंदी कायद्यान्वये २८ गुन्हे दाखल करण्यात आले. महाराष्ट्र जुगार अधिनियमान्वये तीन जणांवर कारवाई करण्यात आली; तर मोटर वाहन कायद्यान्वये १८० वाहनधारकांवर कारवाई करत त्यांच्याकडून ७० हजार ९५० रुपये दंड वसूल करण्यात आल्याचे पोलिस अधीक्षक कार्यालयाकडून सांगण्यात आले.