सराईत मोबाईल चोरट्यास अटक

घाटकोपर, ता. ६ (बातमीदार) ः विविध नागरिकांचे आणि कंपन्यांचे तब्बल नऊ महागडे मोबाईल चोरून ते जमिनीत पुरून ठेवणाऱ्या एका सराईत चोराला बोरिवलीतील एमएचबी पोलिसांनी अटक केली आहे. विजय सना सुरेला असे त्याचे नाव असून पोलिसांनी तीन गुन्हे उघडकीस आणून नऊ मोबाईल हस्तगत केले आहेत. गेल्या १९ जून रोजी विकास कुमार राधिकारमन राय यांचा मोबाईल चोरीस गेला होता. त्यांच्या तक्रारीवरून पोलिसांनी आरोपी विजय सना सुरेला याला अटक केली असता अन्य मोबाईलही सापडले. याप्रकरणी वरिष्ठ पोलिस निरीक्षक सुधीर कुडाळकर यांच्या मार्गदर्शनाखाली सहायक पोलिस निरीक्षक सूर्यकांत पवार आणि पथकाने कारवाई केली.