झाड पडल्‍याने वाहतूक खोळंबली

सकाळ वृत्तसेवा
ठाणे, ता. ११ : कळवा, खारेगाव नाका, येथे राजदीप हॉटेलसमोर रस्त्यावरती झाड पडल्याची घटना सोमवारी पहाटे ४ वाजण्याच्या सुमारास घडली. याची माहिती ठाणे महापालिका आपत्ती व्यवस्थापन कक्षेला मिळताच घटनास्थळी आपत्ती व्यवस्थापन, वृक्ष प्राधिकरण, टोरंट विद्युत, कळवा वाहतूक पोलिस आणि अग्निशमन दल हे विभाग दाखल झाले. या घटनेत रस्त्याकडेला उभ्या केलेल्या एका चारचाकी वाहनावर ते झाड पडल्याने त्या गाडीचे नुकसान झाले. त्यातच, ते झाड ठाण्याकडून मुंब्र्याकडे जाणाऱ्या रस्त्यावरती पडल्यामुळे त्या रस्त्यावरील वाहतूक सुमारे तीन तास ठप्प झाली होती. तसेच रस्त्यावरती पडलेले झाड आपत्ती व्यवस्थापन, वृक्ष प्राधिकरण आणि अग्निशमन या तिन्ही विभागाच्या कर्मचाऱ्यांनी कापून बाजूला केले. त्यानंतर तो रस्ता वाहतुकीसाठी मोकळा करण्यात आला आहे. या घटनेत कोणालाही दुखापत झाली नसल्याची माहिती आपत्ती व्यवस्थापन कक्षाने दिली.