नवी मुंबई विमानतळ नामकरणाला अमित ठाकरे यांचे समर्थन

पनवेल (बातमीदार) : रायगड दौऱ्यावर आलेले मनसेचे विद्यार्थी सेनेचे अध्यक्ष अमित ठाकरे यांनी सोमवारी (ता. ११) पनवेलमध्ये लोकनेते दि. बा. पाटील यांच्या घरी जाऊन त्यांना अभिवादन केले. या वेळी त्यांनी नवी मुंबई आंतरराष्ट्रीय विमानतळाला दि. बा. पाटील यांचे नाव देण्याला पाठिंबा जाहीर केला. अमित ठाकरे यांनी दि. बा. पाटील यांच्या घरी जाऊन त्यांच्या कुटुंबीयांची भेट घेतली. या वेळी त्यांचे पुत्र अतुल पाटील आणि त्यांच्या पत्नीने त्यांचे स्वागत केले. त्यांनी दि. बा. यांच्या कार्याची महती अमित ठाकरे यांना सांगितली. अमित ठाकरे यांनी नवी मुंबई आंतरराष्ट्रीय विमानतळाला दि. बा. पाटील यांचे नाव देण्याच्या निर्णयाचे समर्थन केले. या वेळी अतुल पाटील यांना सन्मानचिन्ह देऊन गौरवण्यात आले. पाटील यांनी त्यांच्या मातोश्री ऊर्मिला पाटील यांनी लिहिलेले पुस्तक अमित ठाकरे यांना भेट दिले.