आयुक्त विजय सूर्यवंशी यांची बदली

डोंबिवली, ता. १२ ः कल्याण डोंबिवली महापालिकेचे आयुक्त डॉ. विजय सूर्यवंशी यांची बदली झाली असून ठाणे जिल्हा परिषदेचे मुख्य कार्यकारी अधिकारी भाऊसाहेब दांगडे यांची नियुक्ती आयुक्तपदी करण्यात आली आहे. आयुक्त सूर्यवंशी यांनी अडीच वर्षांचा कालावधी केडीएमसीमध्ये पूर्ण केला आहे. कोरोना काळात त्यांनी अनेक धाडसी निर्णय घेतले. त्यांच्या कोरोना काळातील कामगिरीमुळेच कल्याण डोंबिवली महापालिकेला कोव्हिड इनोव्हेशन पुरस्काराने सन्मानित करण्यात आले.

कल्याण डोंबिवली महापालिकेचे तत्कालीन आयुक्त गोविंद बोडके यांची आयुक्त पदावरून उचलबांगडी करत राज्य सरकारने फेब्रुवारी २०२०मध्ये आयुक्त पदाची धुरा डॉ. विजय सूर्यवंशी यांच्यावर सोपवली. डॉ. विजय सूर्यवंशी हे २०१०च्या बॅचचे आयएएस अधिकारी आहेत. शहरातील रखडलेला कचरा प्रकल्प, निधीअभावी खोळंबलेली विकासकामे, शिवसेनेसाठी प्रतिष्ठेची असलेली पालिका निवडणूक, सर्वोच्च न्यायालयाने बांधकामांवर घातलेली बंदी यांसारख्या गंभीर विषयांवर आयुक्त सूर्यवंशी यांना निर्णय घ्यायचे होते. परंतु कोरोना संसर्गाची लाट आली आणि आयुक्तांसमोर एक वेगळेच आव्हान उभे ठाकले. पालिकेची आर्थिक स्थिती नाजूक त्यात शहरातील आरोग्य यंत्रणा कमकुवत होती. ही कमतरता भरुन काढत आजच्या घडीला कल्याण डोंबिवली महापालिकेत एक बळकट अशी आरोग्य यंत्रणा उभी राहिली आहे.