कांदा बटाटा लिलावगृहाची कमान कोसळली

नवी मुंबई, ता. १२ (वार्ताहर) : एपीएमसीतील कांदा बटाटा मार्केटमधील लिलावगृहाच्या छताची लोखंडी कमान कोसळल्याची घटना मंगळवारी (ता. १२) सकाळी घडली आहे. लोखंडी कमान वाहनावर कोसळल्याने कुठलीही दुर्घटना घडली नाही. मात्र, या घटनेमुळे कांदा बटाटा मार्केटमधील धोकादायक झालेल्या लिलावगृहाचा प्रश्न ऐरणीवर आला आहे.

वाशी येथील एपीएमसीतील कांदा बटाटा मार्केटमध्ये शेतमाल घेऊन येणाऱ्या शेतकऱ्यांसाठी तसेच व्यापाऱ्यांसाठी लिलावगृह उभारण्यात आले आहे. या लिलावगृहात दररोज मोठ्या प्रमाणात खरेदी विक्रीचे व्यवहार होत असतात. मंगळवारी सकाळी लिलवगृहात वाहनातील शेतमाल उतरवण्यासाठी वाहन उभे असताना येथील लोखंडी कमान अचानक खाली कोसळली. ही कमान थेट वाहनावर कोसळली. या घटनेनंतर एपीएमसी प्रशासनाने लोखंडी कमान कोसळलेला भाग सील केला आहे.