मुंबईतून १४ लाखांची इ सिगारेट हस्तगत

सकाळ वृत्तसेवा
मुंबई, ता. १५ : पोलिसांनी केलेल्या कारवाईत मुंबईतून १४ लाखांचा ई-सिगारेटचा साठा हस्तगत करण्यात आला आहे. पोलिसांनी १२ ठिकाणी छापे टाकत ही कारवाई केली आहे.
मुंबई पोलिसांच्या आर्थिक गुन्हे शाखेच्या सी. बी. कंट्रोल कक्षाकडून मुंबईत ई-सिगारेट उत्पादनांची विक्री करणाऱ्या दुकानदारांवर कारवाई केली. पोलिसांनी मिळालेल्या माहितीची खात्री केल्यानंतर १२ वेगवेगळी पथके तयार करण्यात आली.
या पथकांनी पाली नाका, खार, लोखंडवाला अंधेरी, मालाड येथे ११ दुकाने व ऑनलाइन पद्धतीने विक्री करणारे विक्रेते अशा १२ ठिकाणांवर छापा टाकत कारवाई केली. पोलिसांच्या या कारवाईत २०३० इलेक्ट्रॉनिक सिगारेट, हुक्का फ्लेव्हरचे ९६३ बॉक्स, ई-सिगारेटच्या रिफीलींगच्या ५३ बॉटल्स असा १४ लाख रुपयांचा मुद्देमाल जप्त केला. या कारवाईत ११ जणांना अटक करण्यात आली असून पोलिसांनी या प्रकरणात गुन्हा नोंदवत पुढील तपास सुरू केला आहे.