मुंबई महापालिका नव्याने सोडत काढणार

मुंबई, ता. २० : महाराष्ट्रात ओबीसी आरक्षणासह निवडणुका घेण्यासाठी सर्वोच्च न्यायालयाने हिरवा कंदील दिल्यानंतर मुंबई महापालिकेतही ओबीसी आरक्षणासाठीचा मार्ग मोकळा झाला आहे. त्यामुळे महापालिकेकडून ओबीसी आरक्षणासह नवी सोडत काढली जाण्याची शक्यता आहे. त्यासाठी राज्य निवडणूक आयोगाच्या आदेशाची महापालिकेला प्रतीक्षा आहे.
राज्य निवडणूक आयोगाच्या निर्देशानुसार लवकरच ओबीसी आरक्षणासंदर्भातील पुढील रणनीती निश्चित करण्यात येईल, अशी माहिती मुंबई महापालिकेचे अतिरिक्त आयुक्त संजीव कुमार यांनी सांगितले; तर न्यायालयाच्या आदेशाचा अभ्यास करण्यात येईल. त्यानंतरच पुढील निर्णय घेण्यात येईल, अशी माहिती राज्य निवडणूक आयोगाकडून देण्यात आली. ओबीसी आरक्षण लागू झाल्याने महापालिकेला ६१ जागांसाठी नव्याने सोडत काढावी लागणार आहे.