मुंबईत बूस्टर डोसला थंड प्रतिसाद?

सकाळ वृत्तसेवा

मुंबई, ता. २२ : केंद्र सरकारने १८ ते ५९ वर्षे वयोगटासाठी ७५ दिवस मोफत बूस्टर डोस मोहीम सध्या सुरू केली आहे. मुंबई शहरातही ही मोहीम सुरू असून, गेल्या चार दिवसांत केवळ ४९ हजार नागरिकांनी या लशीचा लाभ घेतल्याचे समोर आले आहे.
मुंबईसह संपूर्ण राज्यात शुक्रवारपासून कोविड लस अमृत महोत्सवाला सुरुवात झाली आहे. या अमृत महोत्सवात १८ ते ५९ वयोगटातील नागरिकांना सरकारी केंद्रांवर बूस्टर डोस मोफत देण्यात येत आहेत. यापूर्वी केवळ आरोग्य सेवा कर्मचारी आणि ६० वर्षांपेक्षा जास्त वयाच्या नागरिकांना मोफत बूस्टर डोस दिले जात होते, परंतु १४ जुलैपासून केंद्र सरकारने सर्व प्रौढ व्यक्तींसाठी मोफत बूस्टर डोस जाहीर केला आहे. त्यानुसार गेल्या चार दिवसांत १८ ते ५९ वयोगटातील ४९,०१७ नागरिकांना पालिका आणि मुंबईतील सरकारी केंद्रांवर मोफत बूस्टर डोस मिळाले आहेत.

सद्यस्थितीत १० ते १२ हजार नागरिक दररोज बूस्टर डोस घेत आहेत; मात्र अपेक्षेप्रमाणे प्रतिसाद मिळत नाही. हा प्रतिसाद वाढवण्यासाठी एक रणनीती आखली जात आहे. ज्यामुळे आगामी काळात लस घेणाऱ्यांची संख्या वाढेल.
- डॉ. मंगला गोमारे, कार्यकारी आरोग्य अधिकारी, मुंबई महापालिका.