रहदारीच्या रस्त्यावरील अनधिकृत वस्ती

पनवेल (प्रतिनिधी) : रेल्वेस्थानक परिसरातील तक्का रस्त्यावरील अनधिकृत वस्ती हटवण्याची मागणी मनसेच्या रायगड जिल्हा महिला अध्यक्षा अदिती सोनार यांनी पालिका आयुक्तांकडे निवेदनाद्वारे केली आहे. पनवेल स्थानकावरून तक्का विभागाकडे जाणाऱ्या रस्त्यावर अनधिकृत वस्ती वसली आहे. या वस्तीमुळे रस्त्यावरून पायी जाणाऱ्या रहिवाशांना गलिच्छ शब्द वापरून धमकावण्याचे प्रकार घडू लागले आहेत. त्यामुळे या ठिकाणाहून जाणाऱ्यांमध्ये भीतीचे वातावरण पसरले आहे. त्यामुळे या समस्येकडे लक्ष देऊन भविष्यात होणाऱ्या गुन्हेगारी प्रवृत्तीला आळा बसावा व या वस्तीवर योग्य ती कारवाई व्हावी, अशा आशयाचे निवेदन प्रीती खानविलकर, शोभा गोरीवले, योगिता गुंजाळ, प्रज्ञा पाटील यांच्या शिष्टमंडळाने पनवेल पालिका आयुक्तांना दिले आहे.