कर्करोग पिडितांना आर्थिक पाठबळ

सकाळ वृत्तसेवा
मुंबई, ता. २९ ः कर्करोगावरील उपचार परवडणारे नसल्याने अनेकांना जीव गमवावा लागतो. अशा पीडितांना ‘कँसर एड अँड रिसर्च फाऊंडेशन’ने मदतीचा आधार दिला आहे. भायखळा येथे झालेल्या एका कार्यक्रमात १५ कर्करुग्णांना किमोथेरपीसाठी लागणारा आर्थिक खर्च म्हणून ७ लाखांपर्यंतची आर्थिक मदत; तर इतर आजारांच्या रुग्णांसाठी रेशन किट्सचेही वाटप केले.
कर्करुग्णांना अनेकदा किमोथेरपी घ्यावी लागते. प्रत्येक वेळच्या किमोथेरपीला किमान २५ ते ३० हजार मोजावे लागतात. त्यानुसार, प्रत्येक वेळच्या किमोथरेपीसाठी या रुग्णांना आर्थिक मदतीची गरज असते. अशा १५ रुग्णांना आर्थिक आणि औषधांची मदत संस्थेतर्फे करण्यात आली. या कार्यक्रमाला प्रसिद्ध अभिनेता आणि कॉरिओग्राफर जावेद जाफरी उपस्थित होते. या माध्यमातून रुग्णांना, आर्थिक, सामाजिक, रेल्वेचा खर्च आणि इतर औषधांसाठी लागणारा खर्च दिला जाणार आहे. तसेच ‘मिशन सहाय’ या प्रकल्पातून धर्मशाळेत राहणाऱ्या कर्करोगपीडितांच्या जेवणाचाही खर्च केला जात आहे.
-----------------------------------------------
कर्करोगाचे निदान झालेल्या लोकांना जीवनात बऱ्याचशा अडचणी येतात. त्यामुळे सीएआरएफ संस्थेच्या माध्यमातून अशा रुग्णांना उपचार आणि दैनंदिन कामात मदत केली जात आहे.
- शमशी मुल्ला, अध्यक्ष, सीएआरएफ