पुणे - गोरखपूर एक्स्प्रेस होणार २२ डब्याची

आता पुणे-गोरखपूर एक्स्प्रेस होणार २२ डब्यांची

सकाळ वृत्तसेवा
मुंबई, ता. ३१ : मध्य रेल्वेने प्रवाशांच्या मागणीनंतर पुणे - गोरखपूर एक्स्प्रेसला प्रथम श्रेणी वातानुकूलित डबा जोडण्याचा निर्णय घेतला आहे. त्यामुळे आता पुणे - गोरखपूर एक्स्प्रेस २१ डब्यांऐवजी २२ डब्यांची होणार आहे. मध्य रेल्वेच्या या निर्णयामुळे पुणे - गोरखपूर एक्स्प्रेसमधून नियमित प्रवास करणाऱ्या प्रवाशांना मोठा दिलासा मिळणार आहे.

मध्य रेल्वेने दिलेल्या माहितीनुसार, रेल्वे क्रमांक १५०३० पुणे-गोरखपूर एक्स्प्रेसला पुणे येथून ८ ऑक्टोबर २०२२ रोजीपासून प्रथम श्रेणी वातानुकूलित एक डबा जोडणार आहे; तर रेल्वे क्रमांक १५०२९ गोरखपूर - पुणे एक्‍स्प्रेस गोरखपूर येथून ६ ऑक्टोबर २०२२ रोजीपासून प्रथम श्रेणी वातानुकूलित एक डबा जोडणार आहे. आता सुधारित संरचनेनुसार, पुणे - गोरखपूर एक्स्प्रेसला एक प्रथम वातानुकूलित, २ द्वितीय वातानुकूलित, ८ तृतीय वातानुकूलित, ५ शयनयान, ५ सामान्य द्वितीय श्रेणी ज्यामध्ये एक गार्ड्स ब्रेक व्हॅन आणि एक जनरेटर व्हॅन असे २२ डबे असणार आहेत. गेल्या काही दिवसांपासून पुणे - गोरखपूर एक्स्प्रेसला प्रथम श्रेणी डबा जोडणीची मागणी केली होती. प्रवाशांच्या मागणीची दखल घेऊन मध्य रेल्वेने पुणे - गोरखपूर एक्स्प्रेसला प्रथम श्रेणी वातानुकूलित डबा जोडण्याचा निर्णय घेतला असल्याची माहिती मध्य रेल्वेने दिली आहे.