केडीएमटी कर्मचाऱ्यांचे प्रश्न मार्गी लावू

कल्याण, ता. १ (बातमीदार) : राज्यात आपली सत्ता आल्याने आपली कामे अडणार नाहीत, कर्मचारी वर्गाचे प्रश्‍‍न सरकार दरबारी मांडून केडीएमटी कर्मचारी वर्गाचे प्रश्न मार्गी लावू, असे आश्वासन खासदार डॉ. श्रीकांत शिंदे यांनी दिले.
केडीएमटी कर्मचारी वर्गाच्या विविध समस्या असून कामगार नेते आणि माजी नगरसेवक रवी पाटील यांनी शेकडो केडीएमटी कर्मचाऱ्यांसह खासदार डॉ. श्रीकांत शिंदे यांची भेट घेतली. विविध मागण्यांसमवेत केडीएमटीमधील ५९ वाहक कर्मचारी स्थायी करणे, जुनी पेन्शन योजना लागू करणे या प्रमुख मागण्यांसह या कामी शासन स्तरावर मंजुरी मिळण्‍याकडे लक्ष वेधले. खासदार शिंदे यांनी वस्तुस्थिती जाणून घेतल्यानंतर तुमचे कोणतेही काम अडणार नाही, असे आश्वासन देत लवकरच राज्याचे मुख्यमंत्री एकनाथ शिंदे यांची भेट घेऊन प्रश्न मार्गी लावू, असे आश्वासन दिले.