महानगरपालिकेला नायगाव-बापाणे प्रवेशव्दाराचा विसर

महापालिकेला नायगाव-बापाणे प्रवेशद्वाराचा विसर
विरार, ता. २ (बातमीदार) : वसई विरार शहर महापालिकेमार्फत शहरात प्रवेश करणाऱ्या मुख्य रस्त्यांवर प्रवेशद्वार (कमानी) बांधण्याच्या प्रस्तावाला नुकतीच मंजुरी देण्यात आली. यामध्ये विरार, नालासोपारा, वसई व नायगाव या शहरात प्रवेश करणाऱ्या प्रवेशद्वारांमध्ये अनुक्रमे विरार, पेल्हार, वालीव व सातिवली या मार्गांची निवड करण्यात आलेली आहे. यासाठी पाच कोटींचा खर्च अपेक्षित आहे. असे असताना महानगरपालिकेला महत्त्वाच्या अशा बापाणे-नायगाव मुख्य रस्त्यावरील बापाणे (राष्ट्रीय महामार्ग ४८) प्रवेशद्‍वाराचा विसर पडल्याकडे माजी सभापती कन्हैया भोईर यांनी महानगरपालिकेचे लक्ष वेधलेले आहे.
सर्वांत वेगाने विकसित होणारा व झपाट्याने लोकसंख्या वाढणारा विभाग म्हणून नायगावची ओळख आहे. वाहतुकीच्या दृष्टीने महत्त्वाचा मानला जाणारा नायगाव पूर्व-पश्चिम उड्डाणपूल वाहतुकीसाठी खुला करण्यात आलेला आहे. यामुळे थेट विरारपासून नायगावपर्यंतचा भाग राष्ट्रीय महामार्गाला जोडला गेला आहे. यामुळे नायगावमधून थेट वसई-नालासोपारा-विरारपर्यंत अत्यंत कमी वेळात पोहोचणे शक्य झाले आहे. त्यामुळे राष्ट्रीय महामार्गालगत असलेल्या बापाणे येथे महानगरपालिकेचे प्रवेशद्वार असणे गरजेचे आहे, असे माजी सभापती कन्हैया भोईर यांनी सांगितले.