या मुलींचे पालक कोण?

मानखुर्द, ता. ४ (बातमीदार) ः सोसायटी ऑफ द हेल्पर्स ऑफ मेरी बालभवन या संस्थेमध्ये रिंकू ( ४ वर्षे), निशा पिंगळे (११ वर्षे) तसेच संगीता कागडे (१५ वर्षे) या तीन मुली वास्तव्यास आहेत. रिंकूला कांदिवली पोलिसांनी डहाणूकर वाडी येथील पदपथावरून ताब्यात घेतले होते व बाल कल्याण समितीच्या आदेशानुसार या संस्थेमध्ये दाखल केले होते. निशा हिला चाईल्ड लाईन या संस्थेने चेंबूरच्या प्रथम बाल आनंद या संस्थेत बाल कल्याण समितीच्या आदेशाने दाखल केले होते; परंतु ती संस्था बंद झाल्यामुळे तिला सोसायटी ऑफ द हेल्पर्स ऑफ मेरी बालभवन या संस्थेत पाठवण्यात आले. तिच्या आईचे निधन झाले असून वडील दारूच्या आहारी गेले आहेत; तर संगीताचे माता-पिता हयात नाहीत. तिच्या आजीने समाजसेवकांच्या मदतीने व बाल कल्याण समितीच्या आदेशाने तिला या संस्थेत दाखल केले होते. या तिन्ही मुलींचे कुटुंबीय तसेच नातेवाईक मागील बराच काळ भेटीसाठी आले नाहीत. त्यामुळे त्यांचा शोध संस्था घेत आहे. पालक तसेच नातेवाईकांनी तात्काळ सोसायटी ऑफ द हेल्पर्स ऑफ मेरी बालभवन, विरा देसाई मार्ग, अंधेरी (पश्चिम) मुंबई या पत्त्यावर किंवा ८८७९१६७९४७, ९३२४१६८४८५ या दूरध्वनी क्रमांकावर संपर्क साधण्याचे किंवा जिल्हा बाल कल्याण समिती मुंबई उपनगर, जिल्हा बाल संरक्षण कक्ष चेंबूर यांच्याशी संपर्क साधण्याचे आवाहन करण्यात आले आहे.