वसईतील दोन मातांचा जगासमोर अवयवदानाचा आदर्श | Sakal
sakal

बोलून बातमी शोधा

वसईतील दोन मातांचा जगासमोर अवयवदानाचा आदर्श
वसईतील दोन मातांचा जगासमोर अवयवदानाचा आदर्श

वसईतील दोन मातांचा जगासमोर अवयवदानाचा आदर्श

sakal_logo
By

प्रसाद जोशी : सकाळ वृत्तसेवा
वसई, ता. १३ : देहदान, त्वचादान आणि अवयवदान गरजू रुग्णांना जगण्यासाठी आशेचा किरण निर्माण करतो; पण अनेक जण गैरसमजुतीमुळे त्याकडे पाठ फिरवतात. वसईत राहणाऱ्या वयाची ८० पार केलेल्या उमेळे गावातील शालिनी वर्तक व बाभोळाच्या कुमुदिनी वनमाळी यांनी मात्र त्वचादान आणि देहदान करून जगासमोर आदर्श निर्माण केला आहे. आपल्या दातृत्वातून त्यांनी ‘मरावे परी अवयवरूपी उरावे’ असा वस्तुपाठ आताच्या पिढीला दिला आहे.
वसई पश्चिमेकडील उमेळे गावातील शालिनी वर्तक (८३) आणि बाभोळा गावात राहणाऱ्या कुमुदिनी वनमाळी (८५) यांचे सोमवारी निधन झाले. शालिनी वर्तक यांनी दीड वर्षापूर्वी देहदान आणि त्वचादानाचा निर्णय घेतला. मुलगा विनित, मुलगी मुलिना चुरी आणि घरातील सदस्यांनीही त्यांच्या निर्णयाचा आदर केला. आपला देह गरजू रुग्णांला जीवनदान देईल, असा उदात्त विचार त्यामागे होता. सोमवारी शालिनी यांचे निधन झाल्यानंतर मुलगा विनित यांनी त्वरित देहदान चळवळीचे प्रणेते पुरुषोत्तम पाटील पवार यांना त्याची कल्पना दिली. त्यानंतर नियमानुसार प्रक्रिया पूर्ण केल्यानंतर त्यांचे त्वचादान आणि देहदान करण्यात आले.
प्रकाश वनमाळी यांनीही आईचे त्वचादान करण्याचा निर्णय कुटुंबीयांसोबत चर्चा करून त्वरित घेतला. वसईत एकाच दिवशी दोन त्वचादान आणि एक देहदान करण्यात आले. वसईत मे महिन्यातत अविनाश कुसे यांनी आपले वडील प्रफुल कुसे यांचे निधन झाल्यावर तत्काळ त्यांचे नेत्र व त्वचादानाचा निर्णय घेतला होता. त्यामुळे सात गरजू व्यक्तींना लाभ झाला.

त्वचा आणि देहदानाचे मोल
त्वचादानामुळे भाजलेल्या रुग्णांना उपचार मिळू शकतात. त्यांचा जीव वाचण्यास मदत होते. देहदानामुळे वैद्यकीय क्षेत्रातील विद्यार्थ्यांना मानवी देहाची परिपूर्ण आणि सखोल माहिती मिळण्यासाठी मदत होते. पुरुषोत्तम पाटील पवार यांची धडपड आणि निधन झालेल्या व्यक्तींच्या कुटुंबीयांची साथ त्यांना मिळाल्याने एकाच दिवशी देहदान आणि त्वचादानाला प्रेरणा मिळाली आहे.
आईने दीड वर्षांपूर्वी प्रकृती चांगली असताना त्वचादान व देहदानाचा निर्णय घेतला. त्यासाठी आम्हाला पुरुषोत्तम पाटील यांच्या जनजागृतीमुळे प्रेरणा मिळाली, असे शालिनी वर्तक यांचे पुत्र विनीत यांनी सांगितले. ‘आईचे निधन झाल्यावर कुटुंबासोबत त्वरित त्वचादानाचा निर्णय घेण्यात आला. त्यानंतर त्वचादान करण्यात आले. अवयव आणि देहदानाविषयी व्यापक जनजागृती होण्याची गरज आहे,’ अशी इच्छा कुमुदिनी वनमाळी यांचे पुत्र प्रकाश यांनी व्यक्त केली.

त्वचादान, देहदान आणि अवयवदान मृत्यूनंतर अनेकांच्या कामी येते. आज समाजात त्याविषयी सकारात्मक विचारांचे बीज पेरले जात आहे. त्याला प्रतिसाद मिळत आहे. वसईत एकाच दिवशी दोन मातांनी त्वचादान व देहदान करून जगासमोर आदर्श आणि अनेकांच्या जगण्याची आशा निर्माण केली.
- पुरुषोत्तम पाटील पवार, संस्थापक-अध्यक्ष, द फेडरेशन ऑफ ऑर्गन ॲण्ड बॉडी डोनेशन

कुठले अवयव दान करता येतात?
शारीरिक व्याधी आणि दुर्घटनेमुळे अनेकांचे शरीरातील काही भाग निकामी होतात. त्यांना अवयव मिळणे कठीण होत असते. त्यासाठी अवयव, त्वचा आणि नेत्रदान करण्यासाठी दाते पुढे यायला हवेत. देहदान-अवयवदान चळवळीत पुढाकार घेण्याची गरज आहे. मृत्यूनंतर नेत्र, त्वचा, रक्तवाहिन्या, फुप्फुस, स्वादुपिंड, मूत्रपिंड, हृदय इत्यादींचे दान करता येते.

अवयवदानाचे पौराणिक महत्त्व
दधिची ऋषी शंकराचे भक्त होते. विश्वकल्याणासाठी त्यागाची भावना ठेवत त्यांनी अस्थींचे दान केले, असा उल्लेख पौराणिक कथेत आहे. पृथ्वीवरील सर्व तीर्थात स्नान करून शरीर पवित्र करून त्यांनी अस्थीदान केले. दानाचे महत्त्व किती हे त्या काळातही सांगण्यात आले आहे. आजच्या आधुनिक युगात मृत व्यक्तींच्या कुटुंबीयांनी त्यांच्या देहदानाचा निर्णय घेतला, तर अनेक गरजूंना निश्चितच फायदा होईल. अवयवदानाच्या चळवळीचाही व्यापक प्रसार व्हायला हवा.

फोटो
कुमुदिनी वनमाळी
शालिनी वर्तक

Web Title: Todays Latest Marathi News Mum22g96682 Txt Palghar

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..