ठाण्यात शिंदे गटाला दबावतंत्राचा पहिला फटका | Sakal
sakal

बोलून बातमी शोधा

ठाण्यात शिंदे गटाला दबावतंत्राचा पहिला फटका
ठाण्यात शिंदे गटाला दबावतंत्राचा पहिला फटका

ठाण्यात शिंदे गटाला दबावतंत्राचा पहिला फटका

sakal_logo
By

सकाळ वृत्तसेवा
ठाणे, ता. १९ ः शिवसेनेतील बंडाळीत ठाण्यातील ६६ माजी नगरसेवकांचा शिंदे गटाला पाठिंबा असल्याचा दावा माजी महापौरांनी केला असला, तरी अंतर्गत घुसमट आता बाहेर येऊ लागली आहे. पालिका अधिकाऱ्यांना हाताशी धरून शहरातील निष्ठावंत शिवसैनिकांवर गुन्हे दाखल करण्याचा सपाटा सुरू आहे. त्याने व्यथित होऊन घोडबंदर भागातील ज्येष्ठ माजी नगरसेवक नरेश मणेरा यांनी आपली निष्ठा ठाकरेंपाशी असल्याचे जाहीर केले आहे. मुख्यमंत्र्यांच्या ठाण्यात शिंदे गटाला हा सर्वांत मोठा फटका मानला जात आहे.
ठाणे शहरातील शिवसेनेच्या माजी ६७ नगरसेवकांपैकी नंदिनी विचारे वगळता ६५ जणांनी मुख्यमंत्री एकनाथ शिंदे यांना पाठिंबा जाहीर केला असल्याचे माजी महापौर नरेश म्हस्के यांनी सांगितले होते. त्या वेळी माजी नगरसेवक नरेश मणेरा हे आजारी होते; मात्र तेदेखील शिंदे गटाबरोबर आहेत असे त्या वेळी सांगण्यात आले होते, परंतु दोन दिवसांपूर्वी मणेरा यांनी खासदार राजन विचारे यांच्यासोबत शिवसेना पक्षप्रमुख उद्धव ठाकरे यांची सदिच्छा भेट घेतली. त्यानंतर त्यांनी ट्विट करून उद्धव ठाकरे यांच्यासोबत असल्याचे जाहीर केले. त्यांच्यासोबत उपविभागप्रमुख माया पाटील, ओवळा माजिवडा चिटणीस नटेश, शाखाप्रमुख जयवंत पाटील, भरत शेळके यांच्यासह शेकडो शिवसैनिकदेखील उपस्थित होते.

सूडबुद्धीने अन्याय
---
गेली अनेक वर्षे केवळ वागळे येथील शिवसेनेच्या नगरसेवकांना महत्त्वाची पदे दिली. इतर भागांवर अन्याय केला. आम्हाला कधीही विश्वासात घेतले नाही. निधीवाटपातही अन्याय केला. तसेच नऊ ते १० वर्षांपूर्वी घर बांधलेल्या शिवसैनिकांच्या विरोधात एम.आर.टी.पी. गुन्हे दाखल करण्यात आले. त्यामुळेच या भागातील गावकऱ्यांनी उद्धव ठाकरे यांच्या गटासोबत जाण्याचा निर्णय घेतला. आम्ही निष्ठावंत शिवसैनिक आहोत. त्यामुळे यापुढेही शिवसेनेसोबतच राहणार असल्याचे नरेश मणेरा यांनी सांगितले.

दिव्यातील माजी नगरसेविका अंकिता पाटीलही शिवसेनेसोबतच
---
दिव्यातूनही शिंदे गटाला आव्हान मिळाले आहे. २५ ब प्रभागातील शिवसेनेच्या माजी नगरसेविका अंकिता पाटील यांनी आपली निष्ठा मातोश्रीसोबतच असल्याचे जाहीर केले आहे. अंकिता पाटील यांनी शिवसेना भवन येथे जाऊन शिवसेना पक्षप्रमुख उद्धव ठाकरे यांची भेट घेतली व शिवसेनेसोबत ठाम असल्याचे जाहीर केले. दिव्यात गेल्या पालिका निवडणुकीत शिवसेनेचे आठ नगरसेवक निवडून आले होते.

Web Title: Todays Latest Marathi News Mum22g97632 Txt Thane

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..