लोकलमध्ये महिलेने दिला गोंडस बाळाला जन्म

सकाळ वृत्तसेवा
डोंबिवली, ता. २ : कसारा येथून टिटवाळा रेल्वेस्थानकात आलेल्या लोकलमध्ये एका महिलेने गोंडस बाळाला जन्म दिला. आज (ता. २) सकाळी पावणे सहाच्या दरम्यान ही घटना घडली असून नवजात बाळ व आई दोघेही सुखरूप आहेत. त्यांना उपचारासाठी टिटवाळा येथील खासगी रुग्णालयात दाखल करण्यात आले आहे.

प्रिया वाकचौरे (वय ३३) या शुक्रवारी सकाळी आटगाव येथून मुंबईच्या दिशेने रुग्णालयात जाण्यासाठी निघाल्या होत्या. लोकलमध्येच त्यांना प्रसूती कळा सुरू झाल्या होत्या. लोकल डब्यातील महिलांनी तत्काळ रेल्वे पोलिसांशी संपर्क साधून याची माहिती दिली. टिटवाळा रेल्वेस्थानकात स्टेशन मास्तरांनी कर्तव्यावर असलेल्या महिला जीआरपी व आरपीएफ यांना लोकलमधील डब्बा तपासण्यास सांगितले. पोलिस महिलांनी लोकल ट्रेन थांबवत तपासणी केली असता प्रिया यांना प्रसूती कळा येत असल्याचे समजले. त्यांची प्रसूती डब्यातच झाल्यानंतर महिला पोलिसांनी इतर प्रवासी महिलांच्या मदतीने प्रिया व बाळाला लोकलमधून बाहेर काढले. रुग्णवाहिकेतून त्यांना खासगी रुग्णालयात नेण्यात आले. बाळ व आई दोन्ही सुखरूप असल्याची माहिती कल्याण लोहमार्ग पोलिस ठाण्याचे वरिष्ठ पोलिस निरिक्षक मुकेश ढगे यांनी दिली.