मध्य, हार्बर मार्गावर रविवारी मेगाब्लॉक

मुंबई, ता. १० : उपनगरी रेल्वे मार्गावरील रुळांची दुरुस्ती तसेच सिग्नल यंत्रणेची कामे करण्यासाठी रविवारी (ता. १२) मध्य आणि हार्बर मार्गावर मेगाब्लॉक घेण्यात येणार आहे. मध्य रेल्वेवर विद्याविहार आणि ठाणे दरम्यान पाचव्या-सहाव्या मार्गिकेवर, तर हार्बर मार्गावरील पनवेल ते वाशी अप आणि डाऊन मार्गावर मेगाब्लॉक घेण्यात येणार आहे.

मध्य रेल्वे
कुठे : विद्याविहार ते ठाणे पाचवी-सहावी मार्गिकेवर
कधी : सकाळी ११ ते दुपारी ३.३० वाजेपर्यंत
परिणाम : ब्लॉकदरम्यान एलटीटी येथे येणाऱ्या मेल/एक्स्प्रेस गाड्या कल्याण ते ठाणे दरम्यान अप जलद मार्गावर वळवण्यात आल्याने १० ते १५ मिनिटे उशिराने पोहोचतील. तसेच एलटीटी येथून सुटणाऱ्या डाऊन मेल/एक्स्प्रेस गाड्या ठाणे आणि कल्याण दरम्यान डाउन जलद मार्गावर वळवण्यात येतील.

हार्बर रेल्वे
कुठे : पनवेल ते वाशी अप आणि डाऊन हार्बर मार्गावर
कधी : सकाळी ११.०५ ते सायंकाळी ४.०५ वाजेपर्यंत
परिणाम : ब्लॉक कालावधीत पनवेल येथून सीएसएमटीकडे जाणाऱ्या अप हार्बर मार्गावरील सेवा आणि सीएसएमटी मुंबई येथून पनवेल/बेलापूरसाठी सुटणाऱ्या हार्बर मार्गावरील सेवा बंद राहतील. पनवेल येथून ठाण्याकडे जाणाऱ्या अप- डाऊन ट्रान्सहार्बर मार्गावरील सेवा बंद राहतील. या ब्लॉक कालावधीत बेलापूर आणि खारकोपर दरम्यान लोकल ट्रेन वेळापत्रकानुसार धावतील. प्रवाशांच्या सोयीसाठी सीएसएमटी ते वाशी दरम्यान विशेष लोकल धावतील.