खड्डेमुक्तीचा पनवेलकरांना त्रास

पनवेल, ता. १४ (बातमीदार): नवीन पनवेल-माथेरान महामार्गाला जोडणाऱ्या पुलाचे दोन्ही बाजूला काँक्रिटीकरणाचे काम सुरू आहे. त्यामुळे या मार्गावर मोठ्या प्रमाणात वाहतूक कोंडी होत असल्याने वाहनांच्या लांबच लांब रांगा लागल्या आहेत. अशातच आता विचुंबे भुयारी मार्ग देखील बंद करण्यात येणार असल्याने पनवेलकरांचा प्रवास अधिक त्रासदायक ठरणार आहे.
नवीन पनवेल-माथेरान महामार्गाला जोडणाऱ्या या पुलामुळे पनवेल तालुक्यातील नेरे आणि माथेरानकडे जाणारी शेकडो गावे, वाड्या, पाडे जोडली असून दळणवळणाचा हा प्रमुख मार्ग आहे. त्यातच विचुंबे, उसर्लीकडे जाणाऱ्या मार्गावर महाविद्यालये व शाळा असल्याने मोठ्या प्रमाणात वाहनांची गर्दी असते. या उड्डाणपुलाची दुरवस्था झाल्याने हा उड्डाणपूल खड्डेमुक्त करण्यासाठी आमदार प्रशांत ठाकूर यांच्या नेतृत्वाखाली पुलावर रास्ता रोको करण्यात आले होते. त्यानंतर नवीन पनवेल उड्डाणपूल आणि एचडीएफसी सर्कल काँक्रिटीकरण करण्यासाठी सिडकोने२ कोटी ४८ रुपये मंजूर करण्यात आले. या कामाची सुरुवात ही दहा दिवसांपूर्वीच झाली आहे. त्यामुळे पनवेलकडे जाणारे वर्दळीचे मार्ग बंद असल्यामुळे ठिकठिकाणी वाहतूक कोंडी होत आहे.
---------------------------------------
रेल्वेमार्ग रुंदीकरणासाठी मार्ग बंद
जेएनपीटी ते वैतरणा सेक्शन फेज -२ या डबल लाईन रेल्वे मार्गाचे काम पनवेल रेल्वेस्टेशन तक्का ते विचुंबे गाव या मार्गावर १३ फेब्रुवारी ते ३० मे पर्यंत सुरू राहणार असल्याने तक्का गाव ते विचुंबेकडे जाणारा भुयारी मार्ग, विचुंबे गाव, नवीन पनवेल ते शिवशंभो नाका मार्ग दोन्ही बाजूच्या वाहतुकीस सोमवार (ता.१३) पासून पूर्णपणे बंद करण्यात येणार आहे.