विक्रमगड तहसील कार्यालयावर नागरिकांचा मोर्चा

विक्रमगड, ता. १७ (बातमीदार) : नगरपंचायतीमार्फत प्रारूप विकास योजना आराखडा प्रसिद्ध करण्यात आला आहे. हा आराखडा रद्द करून त्याबाबत जनसुनावणी घ्यावी, या मागणीसाठी विक्रमगड बचाव सर्वपक्षीय स्व-हक्क कृती समितीमार्फत तहसीलदार कार्यालयावर मोर्चा काढण्यात आला. गावातील ९० टक्के अत्यल्प व अल्पभूधारक शेतकरी भूमिहीन होणार आहे. ३०, ४० व ५० मीटर रुंदीचे सुमारे ६५ रस्ते खरीप जमिनीतून टाकल्याने अनेक शेतकऱ्यांचे नुकसान होणार आहे. गावातील छोटी-मोठी दुकाने व राहती घरे उद्‍ध्‍वस्त होत असल्याने अनेकांना बेघर व बेरोजगारीचा सामना करावा लागणार आहे; तरी सदर प्रारूप आराखडा रद्द करावा, अशी मागणी स्व-हक्क कृती समितीने जिल्हाधिकारी पालघर यांच्याकडे केली आहे. तसेच प्रारूप विकास योजना आराखडासंदर्भात नागरिकांनी हरकती व आक्षेप घेतले आहेत, त्याची सुनावणी २० फेब्रुवारीपासून नगरपंचायत येथे न घेता शासकीय स्तरावरून सुनावणी घ्यावी, अशी मागणी कुणबी सेनाप्रमुख विश्वनाथ पाटील यांच्या नेतृत्वाखाली मोर्चेकऱ्यांनी केली.