रस्त्यावरील चेंबरचे झाकण तुटल्याने अपघाताची भीती

मालाड, ता. २१ (बातमीदार) ः मार्वे रोडवर मालवणी क्रमांक एक येथे रस्त्यावर असलेले पाण्याच्या चेंबरचे लोखंडी झाकण खचल्याने अपघाताची भीती व्‍यक्‍त केली जात आहे. मार्वे रोडखालून जात असलेल्‍या जलवाहिनीला असलेले वोल्व्ह रस्‍त्‍याच्‍या मधोमध असून यासाठी असलेल्‍या चेंबरचे झाकण खचले आहे. पालिकेने हे झाकण त्‍वरित दुरुस्‍त करावे, अशी मागणी नागरिकांकडून होत आहे.
मालवणी परिसरात पाणीपुरवठा करण्यासाठी पालिकेचे कर्मचारी किमान दिवसातून चार वेळेस या ठिकाणी वोल्व्ह उघड बंद करण्यासाठी येत असतात. त्यामुळे हे तुटलेले झाकण त्यांच्या निदर्शनास कसे आले नाही, असा प्रश्न स्थानिक नागरिकांना पडला आहे. स्‍थानिकांनी दिलेल्‍या माहितीनुसार मागील अनेक महिन्यांपासून या झाकणावरून बेस्ट बस आणि इतर वाहने ये–जा करत असल्‍याने या झाकणाची दुरवस्‍था झाली आहे. याबाबत स्थानिक नागरिकांनी पालिकेत माहिती दिली आहे. तसेच वाहतुक पोलिसांनी एका तरुणाच्या मदतीने या ठिकाणी रस्त्याच्या बाजूला पडलेले पेव्हर ब्लॉक उचलून छोटीशी संरक्षण भिंत बनवली आहे. ज्‍यामुळे वाहन चालकांना लांबूनच झाकण तुटल्याची माहिती मिळेल व अपघात टाळता येईल. मात्र ही उपाय योजना तात्‍पुरती असून कायमस्‍वरूपी याची दुरुस्‍ती करावी, अशी मागणी नागरिकांकडून होत आहे.