खांदेश्वर शिव मंदिर तलाव परिसराची स्वच्छता

खांदेश्वर शिव मंदिर तलाव परिसराची स्वच्छता
नवीन पनवेल, ता. २६ (वार्ताहर) : पनवेल महानगरपालिका आणि संत निरंकारी मिशन यांच्या संयुक्त विद्यमाने बाबा हरविंदर सिंग यांच्या जयंतीनिमित्त प्रभाग समिती ब कळंबोली अंतर्गत प्रभाग क्रमांक १६ मधील पुरातन खांदेश्र्वर शिव मंदिर तलाव व परिसरांमध्ये रविवारी (ता. २६) स्वच्छता मोहीम राबविण्यात आली.
आयुक्त गणेश देशमुख यांच्या मार्गदर्शनाखाली ''स्वच्छ जल स्वच्छ मन'' या स्वच्छता मोहिमेमध्ये महापालिकेच्या कळंबोली-नवीन पनवेल प्रभाग कार्यालयातील स्वच्छता निरीक्षक अरुण कांबळे, स्वच्छता कर्मचारी आणि संत निरंकारी मंडळाचे खांदा कॉलनी शाखेचे प्रमुख सत्यप्रकाश पाटील, नवीन पनवेल शाखेचे प्रमुख माणिक धर्माधिकारी, कळंबोली शाखेचे प्रमुख विलास कडू, सेक्टर संयोजक वसंत गौड, क्षेत्रीय संचालक अशोक केरेकर, तसेच संत निरंकारी मंडळाच्या २०० ते २५० सदस्यांनी सहभाग घेतला. या वेळी खांदेश्वर तलावामधील निर्माल्य, मूर्ती, प्लास्टिक गोळा करण्यात आले. तसेच तलावाभोवतीचा जॉगिंग ट्रॅकचीही स्वच्छता करण्यात आली. या स्वच्छता मोहिमेमध्ये सुमारे १४ टन कचरा गोळा करण्यात आला.